Ginpasigurado sang Department of Social Welfare and Development (DSWD) Region 6 nga mahatagan sang bulig pinansyal ang mga trycicle drivers nga apektado sang padayon nga pagsaka sang presyo sang gatong bangud man sa nagapadayon nga tensyon sa Middle East.
Ini ang kabahin sang pilot implementation sang Cash Relief Assistance Program nga patigayunon sang ahensya agud makabulig sa mga drivers nga apektado sang krisis sa langis.
Sa interview sang Bombo Radyo kay Therese Fely Legaste, Information Officer sang DSWD Region 6, iya ginpahayag nga nagakoordinar na ang ila opisina sa nagkalain-lain nga local government units (LGUs) agud masiguro nga mahatagan sang nagakaigo nga cash assistance ang mga apektado nga drivers sa ila tagsa ka lugar.
Suno kay Legaste, padayon ang ila pag-monitor kag pagpakig-angot sa mga LGUs agud mapadasig ang implementasyon sang programa kag mahatagan gilayon sang bulig ang mga nagakinahanglan.
Base sa datos sang ahensya, yara sa masobra 3,800 ka mga driver ang kwalipikado nga makabaton sang Cash Relief Assistance Program sa Roxas City.
Magaumpisa ang payout alas 7:00 sang aga buwas nga adlaw Abril 8, sa Roxas City Civic Center.
