PANITAN, CAPIZ – Padayon nga ginabulong sa magkatuhay nga mga ospital ang duha ka mga persona matapos ang nagluntad nga bungguanay sang ila ginamaneho nga mga motorsiklo sa Barangay Cogon, Panitan, Capiz.
Ginkilala ang mga nagkapilasan nga sanday Pepito Piano, 60 anyos, driver sang Honda TMX nga residente sang nasambit nga lugar kag si Joselito Bombase, 36 anyos nga driver sang Suzuki nga motorsiklo kag residente sang Barangay Bailan banwa sang Pontevedra, Capiz.
Sandig sa inisyal nga imbestigasyon sang Panitan Municipal Police Station nga ginasubay na kun tani ni Bombase ang dalan padulong sa banwa sang Pontevedra sang nasugata sini si Piano kag ginaalegar nagpang-agaw sang linya sa karsada kabangdanan nga nagbungguanay ang ila tagsa ka mga ginamaneho nga motorsiklo.
Bangud sa natabo nga aksidente, nag-angkon sang mga kapilasan sa lawas ang duha ka mga nasambit nga persona nga madasig man nga ginpadangat sa ospital agud mahatagan sang dugang nga pagbulong.
Nagapadayon pa sa karon ang imbestigasyon sang mga kapulisan angut sa aksidente.
