MAMBUSAO, CAPIZ- Natigayon nga madakpan ang duha ka mga indibidwal sa ginpatigayon nga search warrant implementation sang mga katapo sang Mambusao Municipal Police Station sa Sitio Hinglid, Barangay Maralag, Mambusao, Capiz.
Ang mga nadakpan amo sanday alyas ‘John Paul’, 39-anyos, alyas ‘Edison’, 34-anyos kag lunsay residente sang nasambit nga lugar.
Sa interview sang Bombo Radyo kay Police Captain Shaney Allanic, Hepe sang Mambusao Municipal Police Station, iya ginpahayag nga ang amo nga mga indibidwal ang may record sa amo nga barangay.
Nakuha sa paghinakop ni alyas ‘John Paul’ ang isa (1) ka unit sang short-barreled 12 gauge improvised shotgun, kag 24 ka mga bala, samtang nakuha naman sa posesyon ni alyas ‘Edison’ ang isa (1) ka unit sang breaktype homemade shotgun, duha ka mga live ammunition nga naka sulod sa medyas, 14 ka sachet sang ginapatihan iligal nga droga nga ginabulubanta nagabug-at sang 90-100 gramos nga may standard drug price nga P810,000, isa (1) ka lighter kag isa (1) ka digital weighing scale.
Nagapangatubang sa kaso nga paglapas sa Republic Act 10591 ukon ‘Comprehensive Firearms and Ammunition Regulation Act’ si alyas ‘John Paul’, samtang kaso sa paglapas sa Republic Act 10591 ukon ‘Comprehensive Firearms and Ammunition Regulation Act’ kag kaso sa paglapas sa Republic Act 9165 ukon ‘Comprehensive Dangerous Drugs Act of 2002’ si alyas ‘Edison’.
Sa karon, nagapabilin ang mga ini sa kustodiya sang Mambusao Municipal Police Station kag natalana nga pasakaan sang kaso.
Interviewed by Bombo Sunnie Mae Constantino Batencila
