ROXAS CITY – Padayon ang imbestigasyon sang Roxas City Police Station kag pagtumod sa pagkakilanlan sang duwa ka suspetsado nga naghold-up sa isa ka babayi sa McKinley Street, Roxas City.
Ang wala na ginhingadlan nga biktima ang residente Pontevedra apang temporaryo nga nagatiner sa nasambit nga syudad.
Sandig sang Roxas City PNP, takna alas 4:30 sang kaaganhon kahapon nga adlaw, samtang nagalakat ang biktima padulong sa isa ka ahensya sa McKinley Street agud kuntani mag-apply bilang domestic helper sa luwas sang pungsod.
Apang, pag-abot sa nasambit nga lugar, hinali nalang may nagpundo nga motorsiklo sakay ang duwa ka suspetsado nga lunsay mga lalaki kag nagdeklarar sang hold-up.
Nataban sang wala matumod nga mga suspek ang cellphone sang biktima kag kwarta nga nagabalor sang P700 nga iya kuntani pagagamiton para sa pagproseso sang pila ka mga dokumento.
Sa karun, isa lang ka tandem ang ginalantaw sang kapulisan nga may kahimuan sang nasambit nga krimen.
