ROXAS CITY- Pilas sa hawak ang naangkon sang isa ka construction foreman matapos ginluthang sang isa ka van driver takna 8:20 kagab-i, Enero 9, 2024 sa Arquisola Subdivision, Barangay Lawaan, Roxas City.
Ginkilala ang biktima nga si alyas ‘Jade’, 49-anyos samtang ang suspek amu si alyas ‘George’, yara sa legal nga pang-edaron lunsay mga residente sang nasambit nga lugar.
Sandig sa imbestigasyon sang Roxas Component City Police Station (RCCPS), nagbaisay ang duha nga lunsay yara sa idalum sang makahulubog nga ilimnon, sang hinali na lang gingabot sang suspek ang wala pa matumod nga sahi sang armas-luthang kag ginluthang ang biktima.
Gilayon nga gindala sa ospital ang biktima para sa pagbulong samtang madasig naman nagpalagyo ang suspek.
Nagaguwa sa imbestigasyon nga daan nga hiligut-anon ang motibo sa pagpangluthang.
Sa karon, padayon ang hot pursuit operation sang kapulisan batok sa suspek.
