Prangka nga ginbuyagyag kag gintudlo ni Former governor Ilocos Sur nga si Luis “Chavit” Singson nga si Pres. Ferdinand Marcos Jr. kag anay House Speaker kag Leyte 1st District Rep. Martin Romualdez ang ginaalegar “mastermind” sa isyu sang korapsyon sa mga flood control projects sang Department of Public Works and Highways (DPWH).
Sa isa ka press briefing kahapon nga adlaw, ginpahayag ni Singson nga ginlakip si Former Ako Bicol Party-List Representative Elizaldy ”Zaldy” Salcedo Co agud mangin mas malapad kag organisado ang pagtipon sa mga flood control projects.
Ginpresentar man sang anay gobernador ang 14 ka mga kongresista nga ginapahayag may yara sang binilyon nga balor sang allocables.
Nagapanguna sa panumbungon amo si House Majority Leader Sandro Marcos nga gina-alegar may masobra P15 billion nga allocables para sa flood control projects.
Kaangut sini, wala pa sang sabat ang Malacañang sa mga alegasyon nga ginpalab-ot ni Singson.
Samtang, nagpanawagan man ang anay gobernador sa mga relihiyoso nga grupo nga magtingob kag maghiwat sang hublag protesta bangud sa ginaalegar maanomaliya sa flood control projects sang gobyerno.
Pahayag pa niya, personal siya nga magahambal sa nagkalain-lain nga relihiyoso nga organisasyon agud ma-engganyo ang ila paghiliusa sa panawagan nga pamatukan ang graft kag corruption.
Gin-engganyo man sini ang mga Pinoy nga magpartisipar sa iya gintawag nga “one-time, big-time” rally.
