ROXAS CITY – Balik-karsel sang Roxas City PNP ang isa ka persona nga gabunan sa pagpangawat sa syudad sang Roxas.
Ginkilala ang suspek kay Ryan Terante alyas “Ryan Amo” nga residente sang Barangay Lawaan, sini nga syudad.
Sandig sa ginpalab-ot nga reklamo ni Ma. Jissa Aponesto, sang Barangay Cabugao, sini nga syudad, nga mga alas-3 sa kaaganhon sang nagligad nga adlaw, nagpangihi ang iya magulang nga si Angelo Aponesto sang may nakit-an ini nga lalaki nga nagapaguwa sa ila balay.
Didto kag ginlagas ini sang iya magulang kag ni Noel Cordova, apang nakapalagyo ini.
Kadimalas sang makawat bangud nabilin ang iya ‘service’ nga mountain bike rason nga nakilala ini matapos ang follow-up investigation sang mga kapulisan, kag positibo nga ginkilala sang mga witness ang suspek nga si alyas “Ryan Amo”.
Narekober sa paghinakop sang suspek ang duha ka mga cellphone, duha ka mga wallet nga nagikan sa duha ka balay, kag benta sa tiyangge sang iya ginkawatan.
Nahibaluan nga guwa-pasulod sa presohan ang suspek bangud sa amu man nga aktibidad.
Sa karon, natalana nga pasakaan sang kaso nga pagpangawat ang nasambitan nga suspek.
