Nangin madinalag-on ang ginpatigayon nga filing sang certificate of candidacy sang mga nagapapili para sa palaabuton nga midterm election 2025.
Sa interview sang Bombo Radyo kay PCMS Ramil Arcangeles sang Roxas City PNP, ginpahayag sini nga sumugod Oktubre 1 may ara na nga mga ginpapanaog nga direktiba sa katapo sang kapulisan. Suno kay Arcangeles nga nagtingub sang pwersa ang Capiz Provincial Office, Quick Response Team, kag nagpahamtang man sang police assistant desk agud mag-assist sa mga magapapili nga maga-file sang COC kung sila ang magapadulong sa mga venue.
Magluwas pa diri may mga kapulisan man nga naga-assist sa guha sang venue agud mapabilin ang kalinong kag katawhay.
Bangud sini, dako ang ila pagpasalamat sa tanan nga mga nagfile sang COC kag mga supporters nga nagsunod sa mga pagsulundan nga gindihon sang Commission on Elections (COMELEC) agud mangin matawhay ang filling.
Mahibaluan nga madamo nga mga kapulisan ang ginlapta sa syudad sang roxas kadungan sa ginpatigayon nga filling kag base sa ila monitoring wala sang may nabalhag nga dalagkuan nga insidente.
Ginsiling man ni Arcangeles nga ginapreparahan man nila sa karun ang mangin mandato sang COMELEC kung sa diin ang pagpatigayon sang nationwide checkpoint.
Samtang, nakaplastar na suno diri ang ila mga pagahimuon para sa palaabuton nga pagpiniliay sa masunod nga semana.
