ROXAS CITY – Ginmanduan ni Governor Esteban Contreras ang mga tag-iya sang hotels, restaurants, resorts, kag iban pa nga stakeholders sa probinsya nga magkuha lamang sang karne sang baboy kag iban pa nga processed products sa ila local sources.
Ini ang sandig sa ginpapanaog nga African Swine Fever Advisory sang opisyal agud indi makasulod ang ASF sa probinsya.
Ginadumilian man sang gobernador ang mga ini nga magkuha sang karne sang baboy, processed kag canned products sa mga pungsod nga apektado sang ASF subong man sa bahin sang Luzon nga wala sang nagakaigo nga dokumento kaangay sang Veterinary Health Certificate, Meat Inspection Certificate naggikan sa National Meat Inspection Service, kag Shipping Transport Permit.
Mahibaluan nga nagpositibo ang probinsya sang Rizal kag Bulacan sa ASF nga nagresulta sa kamatayon sang mga baboy sa lugar.
Subong man, nagakadapat nga ihaboy nila sang nagakaigo ang ila food kag kitchen wastes ukon damog agud indi ini mabahog sa mga baboy.
Ginapabulig man sila sang gobernador sa pagmonitor sa iligal nga distribusyon sang karne sang baboy kag iban pa nga pork products sa probinsya.
