Ginpasalig ni House Majority Leader kag Ilocos Norte 1st District Representative Sandro Marcos nga indi pagbalabagan sang Kamara ang ano man nga reklamo sa impeachment batok sa iya amay nga si Presidente Ferdinand Marcos Jr.
Suno sa iya, importante nga mabatian sang Kamara ang anuman nga impeachment complaint nga ipasaka bisan pa nga batuk ini sa iya amay.
Dugang pa niya, tumanon niya ang iya trabaho sa Kamara agud masabat ang mga reklamo sa impeachment.
Trabaho man niya suno sa iya nga ipalab-ot sa House Committee on Justice ang tanan nga reklamo sa impeachment agud nga malakip ini sa Calendar of Business kag istoryahan sa plenaryo.
Matandaan nga nag-file sang impeachment complaint si Atty. Andre de Jesus batok sa Presidente nga gin-endorso ni Pusong Pinoy party-list Rep. Jett Nisay bangud sa betrayal of public trust.
Duha pa ka grupo ang nagtuyo nga magpasaka sang impeachment complaints batuk sa Presidente apang wala nabaton sang Office of the House Secretary General Cheloy Garafil bangud yara ini sa luwas sang pungsod bangud sa opisyal nga hilikuton.
