ROXAS CITY – Nagapabilin pa nga blangko ang kapulisan sa banwa sang Dao sa identity sang suspek nga ginaalegar nagsulod sa balay sang 60-anyos nga ginang kag nagtaban sang P104mil nga kuwarta.
Ginpahayag ni Police Corporal John Rey Tercero, imbestigador sang Dao Municipal Police Station nga padayon pa ang ila imbestigasyon agud matumod ang responsable sa pagtaban sa kuwarta sang senior citizen nga si Leonida Paja sang Barangay Agtambi, Dao, Capiz.
Ba-se sa pagpangusisa sang kapulisan sa biktima nga nagatan-aw ini sang TV sang nabatian ang pagkinagamo sang iya hinuptan nga manok.
Nagguha ini agud tsekyaron ang natabo sa diin hinali na lamang nga may naghawid sa iya nga lalaki kasunod ang pagtutok sa iya sang armas.
Ginpwersa pa ini nga magsulod sa ila balay para kuhaon ang kuwarta.
Sa kahadluk sang senior citizen ginkuha sini ang bag nga nagaunod sang kuarta kag ginhatag sa suspek.
Gilayon nga nagpalagyo ang wala makilala nga persona matapos ang insedente.
