PANITAN, CAPIZ – Igo sang ginapahayag buno sa wala nga bahin sang dughan ang ginatudlo nga gintunaan sang kamatayon sang isa ka Senior Citizen nga lalaki sa Sitio Katalunan, Brgy. Enseñagan, Panitan, Capiz.
Matandaan nga ginkilala ang biktima kay alyas “Jose”, 67-anyos kag residente sang nasambit nga lugar.
Sa interview sang Bombo Radyo kay PMAJ. Amy Bulaquena, hepe sang Panitan Municipal Police Station, ginpahayag sini nga base sa resulta sang autopsy sa bangkay sang biktima, nakitaan ini sang igo sa wala nga bahin sang dughan sini kag ginapahayag nga umabot sa baga sini.
Matandaan, nasapwan nga nagakulob ang biktima sa guha mismo sang iya nga balay nga may igo sang buno sa wala nga bahin sang iya abaga.
Sa karon, padayon pa nga ginapadalman sang mga otoridad ang imbestigasyon agud madakpan ang suspek kag matumod kun ano ang motibo sini sa nakumiter nga krimen.
