JAMINDAN, CAPIZ – Aminado ang mga katapo sang kapulisan sang Jamindan Municipal Police Station nga mabudlay para sa ila ang pagtumod kun sin-o ang responsable sa paglabo sa isa ka 45 anyos nga mangunguma sa Barangay Jaena Norte, Jamindan, Capiz.
Ini ang ginpahayag ni PSSg Lou Robles, Investigator on Case sang Jamindan MPS sang mainterview sang Bombo Radyo Roxas.
Suno kay Robles nga wala sang malain nga rekord sa barangay ang biktima nga si Gilbert Cusay kag residente man sang nasambit nga lugar.
Dugang pa sini nga wala man sang bisyo ang amo nga biktima.
Ginpahayag sang imbestigador nga may yara na sila sa karon nga ginahawidan nga mga pangalan sa makabig persons of interest rason nga ini ang ginasundan nila sa posible magkatuhay nga mga anggulo sa kun ano ang motibo sang suspek sa paglabo-patay sa biktima.
Ginkumpirmar man ni Robles nga antes pa man nasapwan nga patay ang biktima, nakatuad pa ini sa utod sini nga madamo ini sang nabaton nga mga pagpasibangud nga isa ini ka aswang.
Sa dugang nga pagpangusisa sang mga kapulisan sa pamilya, ginapatihan nga wala man sang may nagpatunga nga pag-inaway-away sa biktima kag sa live-in partner sini.
Samtang, ginahulat nalang sa karon ang resulta sang post mortem examination sa bangkay sang biktima.
Matandaan nga nasapwan na lamang sang pila niya ka mga himata ang nasambit nga biktima nga nagakulob kag may labo sa liog kag tiyan nga gintunaan sang iya kamatayon.
Sandig sa inisyal nga imbestigasyon sang mga otoridad nga naglisensya pa ang biktima nga maga-ani sang gintanum sini nga luy-a apang wala na ini makapauli kag ulihi na sang masapwan nga wala na sang kabuhi.
