ROXAS CITY – Padayon ang imbestigasyon sang mga kapulisan agud matumod ang suspek nga responsable sa pagluthang-patay sa 21-anyos nga lalaki sa Bayot Drive, Barangay IX, Roxas City.
Suno kay Police Staff Sergeant Jazal Andrada, imbestigador sang Roxas City PNP, nagapabilin sa gihapon nga blangko ang mga kapulisan kun ano ang motibo sang suspek sa pagluthang kay Edward Rolio alyas Bulldog residente sang nasambit man nga lugar.
Aminado si Andrada nga nabudlayan ang mga kapulisan sa pagtumod sa amo nga suspek bangud sa kakulangan sang mga impormasyon.
Magluwas diri, wala pa sang CCTV sa lugar nga ginluntaran sang krimen.
Matandaan nga samtang nagainom ang biktima kaupod ang iya barkada nagdesisyon si alyas Bulldog kaupod ang abyan sini nga magbakal sang barbecue sa Roxas Avenue.
Pabalik na sila kuntani sang nagdesisyon nga magpangihi ang biktima apang hinali na lamang ini gintiro sang wala matumod nga persona nga sakay sa motorsiklo.
Narekober sa ginluntaran sang insidente ang lima ka mga empty shells sang .45 kalibre nga armas kag duha ka mga fired slugs sang amo man nga armas luthang.
