ROXAS CITY – Yara na karon sa estable nga kondisyon ang isa ka wala na ginhingadlan nga katapo sang militar matapos ini ginluthang sa natabo nga engkwentro sa tunga sang 12th Infantry Battalion Philippine Army kag mga miyembro sang New People’s Army sa Sitio Pina, Barangay Tacayan, Tapaz, Capiz.
Suno kay Major Cenon Pancito III, tagpamababa sang 3rd Infantry Division Philippine Army nga natabo ang engkwentro sang mga militar kag 15 ka miyembro sang rebelde nga grupo samtang ginapatigayon ang Community Support Program sang Philippine Army.
Ginpahayag ni Pancito nga naglawig sang 10 tubtob 15 ka minutos ang pagbayluhanay sang lupok sa magkatuhay nga grupo.
Nag-angkon naman sang pilas sa nawala nga tiil ang isa ka miyembro sang militar matapos nga natiruhan ini sang rebelde nga grupo.
Sa karon, wala pa sang impormasyon ang mga militar kun may sang napilasan ukon napatay sa nagluntad nga engkwentro.
Apang, may nakita sila nga tulo sang dugo sa lugar kun sa diin natabo ang engkwentro.
Maswerte naman nga wala sang may nadalahig nga mga residente sa lugar.
Nagpasalig naman si Pancito nga padayon ang ila imbestigasyon samtang ginpakamaayo sini nga dugangan ang miyembro sang militar sa lugar agud masiguro ang seguridad sang mga residente batuk sa rebelde nga grupo.
Matandaan nga gin-harass man sang mga rebelde ang grupo sang militar sang nakaligad nga Hulyo 8 sining tuig sa amo man nga barangay kun sa diin nadalahig kag napilasan ang isa ka solterito sa nagluntad nga engkwentro.
