Patay ang isa ka pulis sang Quezon Provincial Mobile Force Company (QPMFC) sa engkwentro sa armado nga grupo sa Sitio Pulyok, Barangay San Isidro, Candelaria, Quezon sadtong Biyernes.
Base sa report sang Quezon Police Provincial Office, nagapatigayon sang pagpatrolya ang QPMFC sang nasugata kag ginkomprontar sang mga kapulisan ang grupo.
Gilayon nga nagpalupok ang armado nga grupo rason nga napatay ang isa ka pulis kag Duha pa ka iban pa ang nasamdan.
Samtang, Sabado sang aga, liwat nga nagluntad ang engkwentro sa tunga sang kapulisan kag sang armado nga grupo samtang nagapatigayon sang follow-up operation ang kapulisan sa lugar.
Ginpatay sang mga pulis ang lider sang grupo. Narekober sang mga otoridad ang duha ka 5.56-caliber rifles sa ginluntaran sang engkwentro.
Nagpalab-ot naman sang pagpakig-unong ang Quezon Police Provincial Office sa pamilya sang napatay nga pulis.
