ROXAS CITY – Gin-released sa kustodiya sang Ivisan Municipal Police Station ang isa sa duha ka mag-abyan nga nadakpan sang mga kapulisan nga nagagamit sang ilegal nga droga sa isa ka resort sa Barangay Ilaya-Ivisan, Ivisan, Capiz.
Ini ang ginkompirmar mismo ni Police Captain Leomindo Tayupon, hepe sang Ivisan PNP sang mainterview sang Bombo Radyo.
Matandaan nga nadakpan sang mga otoridad nga nagapot-session ang mag-abyan nga sanday John Rodney Obuyes sang Barangay Milibili, Roxas City kag Kristelle Kaye Abella Vito sang Barangay Balatucan, Panit-an, Capiz.
Apang suno kay Tayupon gin-released sang mga kapulisan si Abella Vito matapos nga nahulog sa regular filling ang pagpasaka sang panumbungon nga paglapas sa Section 15 sang Republic Act 9165 ukon Comprehensive Dangerous Drugs Act of 2002 batuk sa iya.
Ini bangud wala nahingagaw ang documentary requirement nga resulta sang drug test kay Abella Vito sang Regional Crime Laboratory.
Suno kay Tayupon halos isa tubtob duha ka semana pa ini kag nagaabot bangud ginapadala pa ini sa national headquarters sang Philippine National Police.
Natigayon naman nga mapasakaan sang panumbungon nga paglapas sa Sections 11, 12 kag 15 sang RA 9165 si Obuyes.
Matandaan nga narekober sa posesyon ni Obuyes ang aluminum foil, tooter, lighter kag duha ka plastic sachet nga may yara pa sang shabu residue.
