ROXAS CITY – Ginabulubanta nga nagalab-ot sa P80,000 ang nangin kahalitan sang pagkasunog sa ginarentahan nga balay sang mag-asawa nga Melvin Solis kag Josefa Progio sa Purok 1, Barangay Libas, Roxas City.
Totally burned ang nasambit nga balay sa diin napatay ang mag-iloy nga Josefa Progio kag Grade 6 pupil nga anak nga si alyas Charlotte matapos ma-trap sa nasunog nga balay.
Suno kay SFO2 Marlon Garbo, deputy city fire marshall sang Roxas City fire station nagaguwa sa imbestigasyon sang talatapan nga nagsugod ang kalayo sa naling-an nga talapahan ukon smoked fish nga kaingud lamang sang nasunog nga bahay.
Nagdaku pa ang kalayo matapos nalab-ot ang tatlo ka mga kariton sang tricycle sang nasambit nga pamilya.
Nahibaluan nga una nga nakaguwa sa nasunog nga balay ang padre de pamilya nga si Melvin kag magaguwa na kuntani ang live-in partner nga si Josefa sang madumduman ang mga anak nga yara sa sulod sang balay.
Gintingwaan pa ni Josefa nga mabuligan ang mga anak nga makaguwa pinaagi sa pag-agi sa bintana sa CR.
Tatlo lamang sa apat ka anak sang mag-asawa ang nakaluwas bangud wala nakaguwa ang isa pa nila ka anak nga Charlotte nga nalipong matapos na-suffocate sa aso.
Narekober ang bangkay sang mag-iiloy sa sulod sang CR nga nagakup-anay.
