ROXAS CITY – Indi makapati ang ginikanan kag himata sang isa ka tuig nga bata nga babayi nga nalumos ang biktima sa manabaw nga tubig nga kaangay isa ka kanal sa likod sang ila balay, sa Hermano Subdivision, Brgy. Punta Tabuc, Roxas City.
Sa pagpakig-angut sang Bombo Radyo sa himata sang indi na paghingadlan nga biktima, natabo ang insidente sang Mayo 25, kun sa diin, mga ginabulubanta alas-10 sa aga, nasapwan nila ang nasambit nga bata, matapos ang pagpinangita sang mga ini sa sulod sang ila balay.
Palaligban sa ginikanan sang bata nga nakalab-ot na sa amu nga porsyon sang ila balay ang iya isa ka tuig kag apat ka bulan nga bata.
Dugang pa diri, ginpakadtuan nila sang albularyo ang ila lugar kag diri ginpahayag nga posible ‘gin-aswang’ ang bata.
Natalana nga igadul-ong sa katapusan nga palahuwayan ang bangkay sang bata sa Hunyo 8, sini nga tuig.
