Gina-alegar gintaban sang isa ka booking salesman ang kapin tunga sa milyon nga balor sang kwarta sa syudad sa Roxas.
Ginkilala ang biktima kay alyas “Ernesto”, 48-anyos, Sales Supervisor sang isa ka Marketing Company, kag residente sang Sitio Takilid, barangay Baybay, Roxas City.
Samtang ang ginatudlo suspek ang ginkilala kay alyas “Jurny”, yara sa legal nga pang-edaron, Booking Salesman sang isa ka Marketing Company, kag residente sang Tanza Gua, barangay Tanza, Roxas City.
Sa impormasyon nga nakuha sang Bombo Radyo nagikan sa Roxas City PNP, ginpahayag nga napaslawan nga ma-remit ni alyas “Jurny” ang kwarta nga nakolekta nagikan sa mga customer sang amu nga kompanya.
Ginpahayag nga duha ka semana nga kita sang kompanya ang wala maremit sang nasambit nga persona.
Mahibaluan nga naglab-ot sa kabug-usan nga P668, 439.45 ang kantidad nga gintaban ni alyas “Jurny”.
Tubtob sa karon, wala pa nakapakita ang nasambit nga suspetsado sa opisina sang amo nga kompanya apang ginatinguhaan nga makuntak ini agud mabawi ang gintaban nga kantidad.
