DAO, CAPIZ– May yara na sang ginalantaw nga person of interest ang kapulisan sa nagluntad nga pagpangluthang-patay sa isa ka lalaki sa Barangay Matagnop, banwa sang Dao, Capiz.
Sa interview sang Bombo Radyo kay Police Captain Rian Ampoyos, hepe sang Dao Municipal Police Station, ginpahayag sini nga posible nga may kaangtanan ang krimen sa trabaho sang biktima.
Nahibalu-an nga empleyado sa isa ka manokan ang biktima kag residente sang Barangay Lahog, Tapaz, Capiz.
Matandaan nga nag angkon sang patal nga pilas sa natuo nga sag-ang ang biktima nga gilayon nga gindala sa Dao District Hospital sang iya mga kaupdanan para kuntani sa nagakaigo nga pagbulong, apang gindeklarar ini nga dead on arrival sang doktor nga nag-atendir.
Sa karon, yara na sa isa ka punerarya ang bangkay sang biktima samtang nagapadayon pa ang imbestigasyon sang mga otoridad.
Nagapanawagan ang kapulisan sa publiko, ilabi na sa mga nakasaksi ukon may nahibaluan sa insidente, nga makipag-angut sa ila opisina agud mabuligan ang imbestigasyon kag mahatagan sang hustisya ang biktima.
