ROXAS CITY – Halo ang nangin reaskyon sang pila ka mga konsumedor sang Capiz Electric Cooperative Inc. (CAPELCO), may kaangtanan sa ginpaguha nga ihibalo sang ahensya kung sa diin may yara sang masobra P2.00 nga pagnubo sang presyo sang kuryente (per kilowatt hour) sang Residential Consumers.
Matandaan nga ang nasambit nga pagnubo sa pagsuluktan ang nagsugod pa sadtong Nobyembre sang tinalikdan nga tuig tubtob subong Enero 2025.
Sa interview sang Bombo Radyo kay Nanay Emily, ginpahayag sini nga dako ini nga bulig para sa ila ilabi na nga madamo ini sang mga appliances nga ginagamit.
Agud makakinot sa kuryente ginpakigbahin sang iloy ang pila niya ka mga pamaagi kaangay na lamang sang pagpatay sang suga kung indi kinahanglanon, malaka nga pagplantsa sang mga panapot kag pag-unplug sang mga saksakan.
Sa separado naman nga interview kay Tatay Paeng, ginpahayag sini nga kaangay wala niya nabatyagan ang ginapahayag pagnubo bangud kung basehan sa iya nga bill wala man sang pagbag-o.
Mahibaluan nga pila sa mga ginalantaw nga rason sang mga konsumedor ang gulpi nga pagbrown out nga naeksperyensyahan sang tagsa-tagsa.
