Arestado ang isa ka lalaki matapos ginserbihan sang warrant of arrest sang mga kapulisan sa Roxas City Police Station sa Pueblo de Panay, barangay Lawaan, Roxas City.
Ginkilala ang arestado kay alyas “Roger”, 57-anyos kag residente sang barangay Banica, syudad sang Roxas.
Sa impormasyon nga nakuha sang Bombo Radyo nagikan sa Roxas City Police Station, ginpahayag nga nagapangatubang sa kaso nga paglapas sa City Ordinance No. 022-2023 ukon ang “No Helmet, No Driving Ordinance”.
Ang nasambit nga warrant of arrest ang gin-isyu kag ginpirmahan ni Hon. Jennie Ann Tayag Logronio, Presiding Judge, Municipal Trial Court in Cities, Branch 1, Roxas City kag napetsahan Pebrero 4, 2025.
Ginrekomendar naman sang korte ang pyansa nga nagabalor P1,000 para sa temporaryo sini nga kahilwayan.
Sa karon, yara na ini sa kustodiya sang Roxas City Police Station para sa nagakaigo nga disposisyon.
