ROXAS CITY – Patay na sang nasapwan ang isa ka wala makilala nga lalaki sa kilid sang dalan sa Barangay San Jose, banwa sang Tapaz.
Nakita sang tag-iya sang tiyangge nga si Josie Florendo, ang biktima nga nagahamyangon sa karsada.
Sa pagpati nga hubog lamang kag nagakatulog ang lalaki nga yara sa atubang sang tiyangge, ginpalapitan niya ini para pukawon.
Apang nakita sini ang dugo kag pilas sa dughan kag iban nga parte sang lawas nga tuga sang pagpangbuno.
Gilayon nga gin-imporma sang ginang ang mga opisyales sang barangay nga amo ang nagpakig-angut sa mga katapo sang Tapaz PNP.
Ba-se sa inisyal nga imbestigasyon sang pulisya nga pangayaw ang biktima bangud wala sang may nakakilala sa iya.
Ginapatihan nga natripingan lamang ini sang wala pa matumod nga mga suspek.
