ROXAS CITY – Madugay na nga gina-monitor sang kapulisan ang lalaki nga nadakpan sa ginpatigayon nga drug buy-bust operation sang kapulisan sa Brgy. Dayao Roxas City.
Sa interview sang Bombo Radyo kay PCMS Ramil Arcangeles, Spokesperson sang Roxas City Police Station, ginpahayag sini nga pinaagi man sa impormasyon sang pumuluyo natigayon nga ma-monitor ang amo nga arestado nga nagaduso sang iligal nga droga.
Matandaan nga ang nadakpan amo si alyas Bry, 27-anyos nga residente man sang nasambit nga lugar kag narekober sa posisyon sini ang lima tanan ka sachet sang ginpatihan shabu, P3,000 nga buybust money kag coin purse.
Magapangatubang sa kaso nga paglapas sa Republic Act 9165 ukon Comprehensive Dangerous Drugs Act of 2002 ang arestado.
Nagapabilin ini karon sa kustodiya sang mga otoridad kag ginahulat na lamang ang resulta sang drug test agud mapasakaan ini sang nagakaigo nga panumbungon.
