ROXAS CITY – Ginkumpirma sang hepe sang Mambusao PNP nga nalumos ang lalaki nga nasapwan kaina sang aga nga isa na ka mayami nga bangkay sa kilid sang creek sa Barangay Balit, sa amo nga banwa.
Ginpahayag ni Senior Inspector Rachel Garnica nga nasapwan sang nagalabay nga si Vincent Jullar ang bangkay ni Marcial Pelongco.
Nagaguwa sa imbestigasyon sang kapulisan nga hubog ang biktima sang naglumpat sa creek kagab-i.
Bangud natabuan nga mabaskog ang ilig sang tubig, wala na ini makabutwa kag patay na sang makita kaina sang aga.
Kumbinsido ang pamilya nga wala sang foul play sa kamatayon sang ila himata bangud may nakakita sa ginhimo sang biktima.
Samtang sa pihak nga nagapati ang pamilya nga wala sang foul play sa kamatayon ni Pelongco, ipaidalum sa gihapon ini sa post mortem examination ang bangkay sini agud matul-id ang gintunaan sang iya kamatayon.
