ROXAS CITY – Atake sa korason ang ginalantaw nga rason sang kamatayon sang 39 anyos nga lalaki nga nasapwan nga wala na sang kabuhi sa nabukid nga porsyon sang Barangay Bolo, Roxas City sadtong Mayo 14.
Ini ang ginpahayag ni Police Lieutenant Colonel Joe Martin Fuentes, ang medico-legal sang Capiz Provincial Crime Laboratory Office sang mainterview sang Bombo Radyo.
Suno kay Fuentes nga matapos ang ila ginpatigayon nga otopsiya sa bangkay ni Ronald Tangi, 39 anyos, tumandok sang San Antonio, Parañaque kag nag-estar sa New Road, Barangay Banica, Roxas City, nagaguwa nga gin-atake ini sa korason kag ini ang napatay.
Posible suno diri nga nagdinalagan ang biktima antes ini gin-atake.
Apisar may nakita nga mga bagras sa mga tiil sang biktima, indi ini patimaan suno kay Fuentes nga may foulplay ang kamatayon sini.
Natukiban man nga nakainom ang biktima antes ini napatay.
Mahibaluan nga sandig sa inisyal nga imbestigasyon, ginapahayag nga antes nadula ang biktima, nagkasu-ay sila sang iya manak nga menor-de-edad nga ginaalegar iya gintuyo nga himuslan.
Ginapahayag nga yara sa luwas sang pungsod ang iloy sang menor-de-edad nga amo ang live-in partner sang biktima.
Matandaan nga nasapwan ang biktima nga wala sang pang-ibabaw nga panapot kag may mga bagras sa magkatuhay nga porsyon sang kalawasan.
