ROXAS CITY (UPDATE) – Ginhiwlay na sa karsel ang isa ka 30-anyos nga lalaki nga nagtuyo palusot sang peke nga voucher sang “double your money investment” sa Barangay Cagay, Roxas City.
Ini matapos nga nahulog na lamang sa regular filing ang kaso sang nasambit nga persona sa diin nagapangatubang ini sang panumbungon nga paglapas sa Article 172 of the Revised Penal Code ukon Crime of falsification.
Matandaan nga ginkilala ang nadakpan nga si John Paul Alianza sang Barangay Tanza Gua sining siyudad.
Ginapahayag nga nagabalor sang halos P2 milyones ang kabug-usan nga kantidad sang apat ka mga vouchers nga ginamit ni Alianza.
Mahibaluan nga apat ka mga pangalan ang yara sa vouchers nga sanday Omar Amorsolo nga may pay-out amount nga P230,00, Cristan Acer nga may P700,000, Jose Lara nga may P710,000 kag Rudy Bigcas nga may P360,000.
Sa interview sang Bombo Radyo kay Alianza nga ginpalihug lamang sa iya ni alyas Toto nga i-cashout ang apat ka mga voucher sa baylo sang P10,000 kada-isa.
Apang, wala ini nangin madinalag-on matapos natukiban sang cashier sang nasambit nga opisina nga peke ang voucher nga ginamit ni Alianza.
Narekober naman sa posisyon ni Alianza ang P13,000 sini nga personal nga kwarta kag apat ka mga peke nga vouchers.
