ROXAS CITY-Patay ang 23-anyos nga lalaki matapos nga ginaalegar nga nahulog sa patrol car sang Pontevedra Municipal Police Station sa Barangay Tacas, Pontevedra Capiz.
Ginkilala ang biktima nga si Erwin Patanao, residente sang Barangay Rizal sa nasambit nga banwa.
Sa interview sang Bombo Radyo sa kay Police Major Christopher Candelario, Chief of Police sang Pontevedra Municipal Police Station ginpahayag sini nga naaksidente sa dalanon ang pakaisa ni Patanao rason nga gin-imbitiran ini nga magpadulong sa Pontevedra Municipal Police Station agud maghatag sang dugang nga detalye kun sa diin ginpasakay ini sa nasambit nga patrol.
Suno kay Candelario nga samtang ginasubay sang patrol ang dalan, hinali nga nahulog sa patrol ang biktima.
Nakaangkon sang pilas sa likod nga porsyon sang iya nga ulo ang biktima nga gindala sa Bailan District Hospital apang ginbawian sang kabuhi samtang ginabulong sa nasambit nga ospital.
Gindugang pa ni Candelario nga naga-isahanon lang nga nagasakay sa likod sang patrol ang biktima sang natabo ang insidente.
Dako ang pagpati ni Candelario nga nagtuyo nga maglumpat ang biktima sa patrol car bangud yara ini sa idalom sang impluwensiya sang makahulubog nga ilimnon.
Sa karon natalana nga igapaidalom sa Autopsy Examination ang bangkay sang biktima.
Samtang nagapadayon pa ang imbestigasyon sang mga kapulisan natuhoy sa natabo nga insidente.
