ROXAS CITY – Nag-angkon sang kapilasan sa magkatuhay nga parte sang kalawasan ang isa ka lalaki matapos natumba ang ginamaneho nga motorsiklo sa Sitio Libas, Brgy. San Esteban banwa sang Pilar.
Ginkilala ang napilasan kay Jonjon Calderon, residente sang Balasan, Iloilo.
Sandig sa impormasyon nga nakuha sang Bombo Radyo, nga magapauli na kuntani ang biktima sa ila puluy-an sakay sa Smash nga motorsiklo kaupod ang isa ka persona nga back rider sini.
Apang, pag-abot sa dalan sa bahin sang Brgy. San Esteban, nadulaan ini sang kontrol sa pagmaneho rason nga natumba ini nga gintunaan sang iya kapilasan.
Ginapahayag nga nadulaan pa sang alinto si Calderon matapos natumba, samtang ang kaupod sini ang nag-angkon lamang sang mga gasgas.
Mahibaluan nga yara sa impluwensya sang makahulubog nga ilimnon si Calderon samtang nagamaneho.
Madasig naman nga ginrespondehan sang BFP-Pilar ang nasambit nga aksidente kag gindapatan sang pauna nga pagbulong ang biktima.
Sa karun, yara na sa Jose M. Colminaries District Hospital sa Brgy. Malbog banwa sang Estancia ang biktima para sa nagakaigo nga pagbulong samtang padayon pa ang imbestigasyon sang mga kapulisan.
