ROXAS CITY, CAPIZ- Ginsulod sang wala pa makilan-an nga mga kawatan ang isa ka lending company sa Arellano Street, Barangay III, Roxas City.
Sa interview sang Bombo Radyo kay Punong Barangay Nelson Ignacio, iya ginpahayag nga nakita sa Closed-circuit Television (CCTV) footage sang amo nga kompanya ang pagsulod sang isa ka suspek sa amo nga opisina kag kaangay nga may yara pa ini sang kaupod nga look-out.
Dugang pa sini, natigayon nga nataban sang amo nga makawat ang cash nga nagabalor sang P43,000 tanan kag siyam (9) ka unit sang mga cellphones.
Nahibaluan nga sa likod nga porsyon sang opisina nag-agi ang amo nga mga kawatan bangud sa mga tapak sini sa duta kag sandig sa imbestigasyon sang mga kapulisan.
Sa karon, may yara na sang persons of interest ang mga kapulisan apang padayon ang verification process kag pag-imbestigar agud mapasabat ang dapat nga manabat may kaangtanan sa pagpangawat.
Interviewed by Bombo Francis Biñas
