ROXAS CITY – Nakabaton ang kapin 152 ka mga vendors sang Dao public market sang financial cash assistance nagabalor P5,000 kada isa nagikan sa Local Government Unit (LGU)-Dao sang Agosto 18.
Ini ang ginkumpirmar ni Hon. Jimbo “Nonong” Barruela, Alkalde sang banwa sang Dao sang mapakig-angutan sang Bombo Radyo.
May kaangtanan ini sa ginpalab-ot sang pila ka mga vendors nga nagaproblema sila sa ila capital bangud sa mahina nga pagdalagan sang ila negosyo tuga sang pandemya nga dala sang Covid-19.
Suno sa alkalde, nagpakig-angut siya sa Department of Social Welfare and Development (MSWD) agud kuhaon ang ila koopersyon kag diri ginsuhesityon ang Sustainable Livelihood Program (SLP) kun sa diin lakip diri ang mga magagmay nga vendors nga nagabaligya adlaw-adlaw sa merkado publiko nga makabaton sang bulig pinansyal.
Dugang pa ni Mayor Barruela, nagpanghatag siya sang school supplies sa mga estudyante sa nagkalain-lain nga bulutho-an sang Dao apisar wala pa sang budget para diri gikan sa nasyunal.
Nagpasalamat man siya sa iya mga abyan nga sanday Mr. Renaldo Cabatug kag Mrs. Grace Buñi Cabatug bangud dako ang nabulig sang mga ini agud matigayon ang pagpanghatag sang school supplies sa mga kabataan.
Nakabaton ang mga Kindergarten tubtob Grade 6 sang nasambit nga grasya kun sa diin nagsugod sang Agosto 15 kag natapos subong nga adlaw Agosto 18.
Gintul-id sang alkalde nga samtang siya ang amay sang Dao, magapadayon ang nasambit nga mga programa para sa mga estudyante kag tinguhaan niya nga mahatagan ini sang pondo agud magapadayon ini kada tuig sa pagbukas sang klase.
Luyag sini magpasalamat sa mga pumuluyo nga nagasuporta sa iya kag nagapasalig nga magatinguha nga mahimo niya ang tanan nga ginpromisa sa mga residente sang Dao.
