ROXAS CITY – Masakit katama batyagon ang pagpanakit sang isa ka anak sa iya kaugalingon nga iloy nga amu ang nagbun-ag, nag-atipan, kag nagpadako sa iya, bangud lamang sa rason nga wala ini nakapreparar sang pamahaw sa Sitio Pagutoc, Barangay Milibili, Roxas City.
Sa panaysayon ni nanay Amalia Magaspar sang mainterview sang Bombo Radyo, ginsiling sini nga mabudlay na para sa iya nga tagaan pa sang tsansa ukon pasensyahon ang iya nga bata nga si Alan Magaspar bangud ginaliwat lang sa gihapon ang iya ginahimo nga pagpanakit.
Bangud diri desidido si nanay Amalia nga pasakaan sang panumbungon ang anak agud matudluaan sang leksyon kag marealisar ang mga sala sini nga buluhaton.
Dugang pa ni nanay, masakit katama batyagon nga kasubong nga daw mabuka ang iya nga tagipusuon bangud wala ini naka-agi sang pagpanakit sa iya ginikanan kag mga utod amu man sa iya bana, sa baylo mismo sa anak pa niya ini naagyan apisar ginhatag man niya ang tanan nga pagbulig kag pagpalangga.
Mahibaluan nga may yara sang kaugalingon nga pamilya si Magaspar, apang ginbulagan siya bangud man sang pagpangsakit kag tuman ka palahubog.
Ginalantaw ni nanay nga rason sang pagpanakit sang iya bata ang pagpangbarkada kag tuman sini nga kahulugbon rason nga wala na ini nakahibalo sang iya ginapanghimo.
Malawig na nga pagpasensya ang ginhatag ni nanay sumugod sang una apang sa karon, indi na sini niya pagtugutan pa nga patup-an siya liwat sang inumol sini.
Dugang pa sini, ginpahayag ni nanay Amalia nga palangga niya sa gihapon ang iya nga bata sa pihak sang mga ginpanghimo sini sa iya bangud suno diri wala sang iloy ang makasarang nga indi pagpalanggaon ang kaugalingon nga anak.
