Padayon ang pag-ulan kag paghuyop sang mabaskog nga hangin sa rehiyon sang Western Visayas tuga sang gintingub nga epekto sang Southwest Monsoon (Habagat) kag mga Tropical Cyclones MIRASOL kag NANDO, suno sa pinakaulihi nga report sang Regional Disaster Risk Reduction and Management Council (RDRRMC) Region VI.
Suno sa Philippine Atmospheric, Geophysical and Astronomical Services Administration (PAGASA), las-3 sang hapon sang Setyembre 22, nasiplatan ang sentro sang Tropical Depression “Mirasol” sa bahin sang Tineg, Abra (17.8°N, 121.1°E) nga may dala nga kabaskugon sang hangin nga nagalab-ot sa 55 km/h kag pagmadlos sang hangin nga naglab-ot sa 90 km/h. Nagahulag ini padulong sa northwest point sa kadasigon nga 20 km/h.
Sang Setyembre 17, pila ka mga banwa sa probinsya sang Iloilo ang nakaeksperyensya sang tayuyon nga mabaskog nga pag-ulan kag pagmadlos sang hangin, nga nagtuga sang pagbaha kag paghuros sang duta (landslide) ilabi na sa mga barangay nga malapit sa mga suba kag pukatod nga lugar.
Bangud sini, pila ka mga residente ang napilitan nga mag-evacuate halin sa tagsa nila ka mga puluy-an.
