TAPAZ CAPIZ – Pilason ang mag-amay matapos ang nagluntad nga shooting incidents sa Sitio Ilaya, Barangay Taslan, Tapaz Capiz, Mayo 10, 2025 takna alas 7:30 sang gab-i.
Ang mga biktima amo si alyas Thoto, 59-anyos kag bata sini nga si alyas “Yan Yan”, 25-anyos kag lunsay mga residente sang Sitio Mawang Barangay Candelaria, Tapaz Capiz.
Sa impormasyon nga nakuha sang Bombo Radyo nagikan sa Tapaz Municipal Police Station, ginpahayag sini nga samtang naga-inum-inom ang mag-amay sa kilid sang feeder road sa lugar sang hinali nga nag-abot ang suspek kag nakig-istorya sa mga ini.
Apang may nagluntad nga wala pag-intindihanay sa tunga ni alyas Thoto kag sang suspek sang hinali ini nga nagbunot sang pusil ang suspetsado kag ginluthang si alyas Thoto sang apat ka beses nga naigo ang iya tuo nga abaga apang nasalabat sini ang anak ni alyas Thoto nga si alyas “Yan Yan”.
Madasig naman nga nakapalagyo ang suspek sa wala mahibaluan nga direksyon samtang ang mga biktima ang gilayon nga gindala sang nagresponde nga mga katapo ang BFP Personnel sa Tapaz District Hospital, Brgy Switch, Tapaz, Capiz apang ginrefer ini sa Roxas Memorial Provincial Hospital, Roxas City.
