ROXAS CITY – Magapangatubang sang kaso ang manugtahi sang sapatos nga si alyas James kag kaupod sini nga babayi matapos nagpositibo ang mga ini sa drug test.
Matandaan nga nadakpan sa akto sang opisyal sang Barangay nga nagasuyop sang iligal nga droga sa isa ka abandonado nga gasolinahan sa Barangay, Cagay, Roxas City si alyas James, 37-anyos kag kaupod sini nga babayi nga ginkilala kay alyas Mikay, 28-anyos nga residente naman sang Brgy. Hipona, Pontevedra, Capiz.
Suno kay Roxas City PNP Chief PLTCOL Lumyaen Lidawan, ginapreparar na ang kaso nga paglapas sa Republic Act 9165 ukon Comprehensive Dangerous Drugs Act of 2002 nga pagaatubangon sang nagkaladakpan.
Sa karon, nagapabilin ang mga ini sa kustodiya sang kapulisan para sa nagakaigo nga disposisyon.
