ROXAS CITY – Ginkumpirma sang chief education supervisor sang Department of Education Roxas City Schools Division nga na-endorso na sa Regional Office sang DepEd sa Iloilo ang reklamo batuk sa isa ka manunudlo nga naghaboy sang lata sang sardinas sa estudyante sa President Manuel Roxas Memorial School South.
Sa interview sang Bombo Radyo Roxas kay Dr. Nerissa Resente, ginpahayag sini nga wala sang disiciplinary authority si Dr. Beriong, ang Roxas City schools division superintendent, bangud ang regional office sang DepEd lamang ang may otoridad sa pagdihon sang disciplinary action sa kasubong sini nga kaso.
Apang sa ila lebel, suno kay Resente naghimo na sila sang aksyon pinaagi sa pagtransfer sa nasambit nga manunudlo sa iban nga eskwelahan para maproteksyunan ang estudyante kag makapadayon ini sa ila nga pag-eskwela.
Suno pa kay Resente nga personal man sini nga na-estorya ang amo nga manunudlo kag suno diri nga napikon lamang ini rason nga iya nahaboy sang lata sang sardinas ang Grade 3 pupil.
Nahibaluan nga nag-angkon sang tatlo ka tahi sa agtang ang estudyante bangud sa nangin samad.
