Market administrator nagahinyu nga butangan sang manugbantay ang ivisan public market agud makalikawan ang pagpangawat

ROXAS CITY – Nagahinyu ang market administrator sang Ivisan public market nga pahamtangan sang manugbantay ang merkado agud mauntat na ang kinawatay sa nasambit nga lugar.

Sa interview sang Bombo Radyo kay Nelinda Aldea, suno diri dako nga bulig kun may yara sang mabantay sa merkado agud mahadlukan ang mga makawat magsulod.

Suno diri, apisar sarado man ang gate sang merkado indi gid malikawan nga masulod sang makawat bangud naga-agi ang mga ini sa atop.

Matandaan nga mas o menus P48,000 ang balor sang nagkalain-lain nga kagamitan ang nataban sang mga suspek kag natigayon nga madakpan ang isa ka menor de edad nga yara sa babaw sang atop.

Natalana naman nga makipaghinun-anon si Aldea sa alkalde sang Ivisan agud maaksyunan ang insidente.