ROXAS CITY – Nagpadulong sa istasyon sang Bombo Radyo Roxas ang isa ka senior citizen kag nagreklamo bangud nataban sang scammer ang iya kwarta nga nagabalor sang masobra P2-Million.
Sa interview sang Bombo Radyo Roxas kay Nanay Lydia, 64-anyos, anay OFW ka residente sang Roxas City, ginpahayag sini nga Abril 20 may nanawag sa iya nga nagpakilala kay Willie Revillame kag nagsiling nga nagdaog ini sang P30,000.
Dugang pa sini nga masunod nga nag-istorya sa iya amo ang ginapahayag staff ni Willie nga si Jenny Jean Mendez sa diin ginpanginbulahan pa ini siya sang amo nga staff.
Suno pa kay Nanay Lydia, una ginpangayuan ini sang P1,000 para maproseso ang iya nadag-an.
Apang ginsundan na ini gilayon sang asud-asod nga tawag sa mga nagpakilala nga staff ni Willie Revillame kag ginapangayuan ini sang kwarta nga ipadala para sa proseso sa central bank kag insurance agud masiguro ang iya kwarta nga nadag-an.
Pahayag pa sini nga kada semana kaduha ini ka beses nga magpadala sa diin may P30,000, P50,000 tubtob P80,000 kag P240,000 ang iya sini ulihi nga ginapadala sa mga nagapahayag nga staff ni Willie nga amo suno diri ang magaproseso sang iya nadag-an.
Dugang pa sini nga dako gid ang iya pagpati bangud ginapadal-an man ini siya sang nga pruweba kaangay sang litrato sang balance sa BDO nga nakapangalan sa iya kag ginpaistorya pa ini sa manager sang bangko.
May mga kaupod man siya nga winners suno diri nga taga-probinsya sang Capiz nga yara sa listahan nga ginpadala sa iya kag iya man ini ginkontak nga isa sa rason nga nagpati pa gid ini.
Ulihi nalang makarasmas ang nasambit nga senior citizen nga na-scam gali ini sang mareyalisar nga dako na sini ang iya mga napadala.
Pahayag sini nga naubos gid ang iya mga tinipon nga kwarta kag nakapangutang na ini sa iban.
Suno pa diri nga nahimo niya na nga ibaligya ang ila duta agud makabayad sa iya ginpang-utangan.
Panawagan sini sa nag-scam sa iya nga ibalik ang iya sini kwarta.
