ROXAS CITY, CAPIZ – Ginpahayag sang kapulisan nga may koneksyon sa iligal nga droga ang motibo sa nagluntad nga shooting incident sa Barangay Punta Tabuc, Roxas City.
Sa interview sang Bombo Radyo kay PCMS Ramil Arcangeles, Spokesperson sang Roxas Component City Police Station, iya ginpahayag base sa ila imbestigasyon nga may daan na nga hiligut-anon ang mga imbolbado sa shooting incident.
Suno kay Arcangeles nga nakakomiter na ang mga suspek sang krimen may kaangtanan sa iligal nga droga.
Matandaan nga nakuhaan sang video footage sang Closed Circuit Television ang duha ka persona nga nagtiruhay sa Sitio Cassandra, Brgy. Punta Tabuc sa sini nga syudad.
Masuwerte naman nga wala sang may napilasan sa amo nga insidente.
Narekober naman sa lugar nga ginluntaran sang insidente ang apat ka basiyo sang bala, isa ka wala naglupok nga bala kag isa ka deformed slug sang wala pa matumod nga sahi sang armas-luthang.
Sa karon, nagapadayon ang imbestigasyon sang mga kapulisan angut sa nasambit nga insidente.
– With a report from Bombo Jessa Mae De Los Santos
