DAO CAPIZ- Yara na sa istable nga kondisyon ang mga nagkalaulamid nga mga indibidwal sa natabo nga aksidente sa dalanon sa Barangay Poblacion Ilawod, Dao, Capiz kadungan sang adlaw sang Byernes Santo, Abril 18, 2025.
Matandaan nga ginkilala ang mga nagkalaulamid nga sanday; alyas “Gilbert”, 28-anyos, driver sang motorsiklo, alyas “Jona”, 36-anyos, driver sang tricycle ukon ang ginatudlo nga driver at fault nga lunsay mga residente sang Barangay Poblacion Ilawod sang nasambit nga banwa, alyas “Juan”, 40-anyos, driver sang multicab, kag apat ka mga pasahero sang tricycle nga wala na ginpanghingadlan nga nagapang-edaron sang 15-anyos, 23-anyos, kag 47-anyos nga lunsay mga residente naman sang Barangay Balucuan, sa kapareho nga banwa.
Suno kay Police Staff Sergeant Anjo Dela Cruz, Imbestigador sang Dao Municipal Police Station, ginpahayag nga yara na sa istable nga kondisyon ang driver sang motorsiklo nga nabungguan kag sang isa ka pasahero sang tricycle nga ginpahayag nga napuruhan bangud nga nagapungko ini sa sidewheel.
Dugang pa sini, apisar nga yara na sa istable nga kondisyon ang duwa ka mga indibidwal, sa gihapon nagapabilin ini sa ospital para sa padayon nga pagpabulong, samtang ang pila pa ka mga persona nga naulamid ang yara naman sa maayos nga sitwasyon bangud nga nag-angkon lang man ini sang minor nga pilas.
Madumduman nga natabo ang insidente samtang manugtabok kuntani ang tricycle nga nagikan sa simbahan padulong sa tuo nga bahin sang karsada, apang hinali sini nga nabungguan ang motorsiklo nga kasugata sini nga padulong man kuntani sa simbahan.
Bangud sa makusog nga impact sang pagkabunggo, natalbo ang motosiklo kag drayber sini kun sa diin nadalasa man ang drayber sang multicab nga nag-akon sang minor nga pilas sa kamot bangud nga nakatungtong ini sa bintana sang amu nga behikulo.
Samtang, temporaryo nga nagkasugot ang magtimbang nga bahin nga pagasabton sang driver sang tricycle ang tanan nga gastos sa ospital sang duwa ka mga indibidwal kag kun indi nga matuman may posibilidad nga pagapasakaan sang kaso ang amu nga driver.
