Daku ang nangin kalipay sang apat ka Fisheries graduate sang Capiz State University-Pontevedra Campus sang makapsar sa October 2025 Fisheries Licensure Exam.
Sa interview sang Bombo Radyo kay Alessandra Nicole Falalimpa, Faculty sang CAPSU-Pontevedra, kag sanday Jessica Berjamin, Ma. Teresa Deviente, Anamarie Oquendo, kag Ellia Mae Gersaniva, mga board passer sang nasambit nga pasinawan, ila ginpahayag nga indi nangin madali ang ila mga naagyan antes nga malambot ang nasambit nga kadungganan.
Suno sa ila, ginpili nila ang kurso nga Fisheries bangud kasubong sang agriculture ini ang main provider sang pagkaon sang mga pumuluyo indi lang sang probinsya sang Capiz kundi sang bug-os nga pungsod Pilipinas.
Pahayag pa nila nangin mabudlay ang proseso sang pag-review ilabi na ang pressure nga nabatyagan sa palibot kag ang pagpangduwa-duwa kun bala makapasar ukon indi.
Daku man ang kadungganan nga nabatyagan sang tanan ng Faculty sang CAPSU- Pontevedra bangud sa pagkapasar sang ila mga pinalangga nga mga estudyante.
Dugang pa sang mga natungdan, ang pangamuyo ang isa sa nangin yabi sa ila nga pagkapasar kag ang todo nga suporta sang ila nga pamilya.
