ROXAS CITY – Luwas na sa katalagman ang 8 ka mga indibidwal nga sakay sang naubon nga baroto sa Sitio Danao, Brgy Agkilo banwa sang Panitan.
Ginkilala ang mga biktima nga sanday Punong Brgy. Basillio Bides Jr, 46-anyos, Jason Dollete, 22-anyos, Kagawad Benjie Bula, 46-anyos, Ronald Deley, 26-anyos, Ronnie Dollete, 59-anyos, Elna Dollete, 60-anyos, Rowel Dollete, 33-anyos kag Charmine Dollete , 39-anyos lunsay mga residente sang nasambitan nga lugar.
Sandig sa imbestigasyon sang Panitan MPS, samtang sakay sa motorboat ang mga biktima nga maga-panagtag kuntani sang relief goods sa mga naapektuhan sang bagyong Agathon, sang aksidente ini nga nabunggo sa matig-a nga bagay, rason nga naubon ang ginasakyan nga baroto.
Madasig naman nga nagresponde ang Panitan Rescuers Team sa mga biktima.
Maswerte nga wala sang may napilasan sa walo ka mga biktima kun sa diin yara na sila karon sa hilway nga kondisyon.
