ROXAS CITY – Nagdanggop sa estasyon sang Bombo Radyo ang isa ka mister matapos ginaalegar nga wala sang may gin-issue nga resibo ang Bureau of Animal Industry sang nagkuha ini sang Veterinary Health Certificate para sa iya duha ka manok nga ipadala sa Manila.
Suno kay Alyas Boy nga magakuha ini kuntani sang Veterinary Health Certificate sa iya duha ka manok nga pangbulang nga kalakip sa mga rekisitos kun magpadala sang ano man nga sahi sang sapat sa barko.
Nagbayad ini sang P150 agud makakuha sang nasambit nga sertipikasyo kag mapadala sa sa barko.
Apang sang nagpangayo ini sang resibo ginkakibot na lamang sini sang nagtuad ang lalaki nga personnel sang Bureau of Animal Industry nga wala sila sang may gina-issue nga resibo.
Nagapati ang tagreklamo nga may anomaliya sa amo nga talatapan bangud sa kapaslawan nila nga makahatag sang resibo.
Gin-athag pa ni Alyas Boy nga nagpangayo ini sang resibo bangud ginsugo lamang siya nga magpadala sang manok kag nabalaka nga pangitaan sang resibo sang tag-iya.
