ROXAS CITY – Patay na sang masapwan ang 28 anyos nga mister matapos naghikog sa sulod sang ila balay sa Barangay Consolacion, Dumalag, Capiz.
Ginkilala ang biktima kay Mark Anthony Febre sang nasambit nga lugar.
Nadiskubrehan sang otod sang biktima ang paghikog ni Mark matapos nagpadulong siya sa balay sini.
Nahibaluan nga antes naghikog ang biktima, nagpadala pa ini sang laragway nga may higot ang liog sa iya misis nga nagatrabaho sa Oman.
Posible nga ginka-alarma sang asawa sang biktima ang nakita nga laragway sang iya nga mister gani gilayon sini nga ginkontak ang iloy sang asawa sa London nga nagtawag naman sa otod sang biktima kag ginsugo ini nga padulongan ang otod sa balay sini.
Dako ang kakibot sang otod ni Mark sang makit-an sini nga nakabitay na ini kag wala na sang kabuhi.
Samtang, nagaguwa sa inisyal nga imbestigasyon sang Dumalag Municipal Police Station nga posible may indi pag-intiendihanay ang mag-asawa.
Nahibaluan nga ginapapuli na sang biktima ang asawa apang nag-extend pa ini sang kontrata bangud nagapakay-o pa sila sang ila balay.
