ROXAS CITY – Patay ang isa ka mister matapos maaksidente sa iya ginamaneho nga motorsiklo kag aksidente nga nalukpan sang iya ginataklos nga armas sa Sitio Esperanza, Barangay Binuntucan, Pontevedra, Capiz.
Ginkilala ang biktima kay Prudencio Baes, Jr., 30 anyos, residente sang Barangay Yating, Pilar, Capiz.
Base sa inisyal nga impormasyon nga nakuha sang Bombo Radyo Roxas, padulong kuntani sa banwa sang President Roxas ang biktima sakay sa iya motorsiklo sang aksidente sini nga nabungguan ang ginasundan nga tricycle nga ginamaneho ni Yolando Francisco Jr., 39 anyos sang Barangay Binuntucan, Pontevedra.
Bangud diri, natumba sa dalan ang motorsiklo sang biktima kag ginaalegar nga aksidente nga naglupok ang nakataklos sa iya nga hawak nga calibre .38 nga armas.
Nag-angkon sang mga patal nga pilas sa lawas ang biktima bangud sa pagkatumba sang motorsiklo kag may igu ini sang bala sa iya nga hita.
Gindala pa sa ospital ang biktima apang gindeklarar nga dead on arrival sang attending physician.
Narekober naman sa nasambit nga lugar ang calibre .38 nga armas nga loaded sang tatlo ka mga bala kag nakataklos pa sa mismo hawak sang biktima.
