ROXAS CITY – Pilas sa ulo ang naangkon sang driver sang motorsiklo matapos nga nabungguan ang kasugata nga top down nga traysikol sa Barangay Balatucan, Panit-an, Capiz.
Ginkilala ang driver sang Kawasaki Bajaj kay Rolendo Dueñas, 46-anyos kag residente sang nasambit nga lugar.
Samtang, ang driver sang top down tricycle ang ginkilala kay Jerry Ibañez, 43-anyos, fish vendor kag residente sang Brgy. Culasi, sini nga syudad.
Sandig sa inisyal nga imbestigasyon sang mga katapo sang Panit-an MPS, nagikan sa Panit-an ang top down kag magapapuli sa syudad sang Roxas, apang nabungguan ini sang kasugata nga motorsiklo.
Ginapahayag nga nagpang-agaw sang linya ang driver sang motorsiklo.
Bangud diri, bumunggo ini sa side-wheel sang top down rason sang iya pag-angkon sang pilas nga gin respondehan sang mga katapo sang Panit-an MDRRMO.
Wala naman nag-angkon sang kapilasan sa lawas ang driver sang traysikol.
Nagdesisyon ang magtimbang nga kampo nga husayon ang nagluntad nga aksidente.
