ROXAS CITY – Yara na sa kustodiya sang Roxas City Police Station ang suzuki nga motorsiklo nga gin-motornap sa Barangay V, Roxas City.
Ini matapos nga nakabaton sang impormasyon ang mga kapulisan sa banwa sang Panitan nga may yara sang motorsiklo nga gin-abandonar sa isa ka malapit nga junk shop sa Barangay Timpaz, Panitan, Capiz.
Nahibaluan nga nakabaton na lamang ang Panitan PNP sang impormasyon gikay kay Joel Daliva kun sa diin ginbaligyaan ini sang motorsiklo sang duha ka mga persona nga sanday alyas Jm kag alyas Noknok sa balor nga P1,000.
Bangud diri, nagduda na si Daliva kag gilayon nga nagreport sa mga kapulisan.
Apang, sang pagbalik na sini wala na ang duha ka mga nasambit nga persona kun sa diin ginbilin na lamang nila ang nasambit nga motorsiklo.
Gilayon naman nga nagpakig-angut ang Panitan PNP sa Roxas City PNP kag didto natukiban nga ang nasambit nga motorsiklo ang ginapanag-iyahan ni Roberto Dela Hente.
Matandaan nga gin-motornap ang nasambit nga motorsiklo sa Barangay V sining siyudad sang damlag lang matapos nga gin-park sang nasambit nga tag-iya sang nagbulig ini karga sang mga butong padulong sa banwa sang Ivisan, Capiz.
