ROXAS CITY – Makabig nga isolated case ang natabo nga shooting incident sa banwa sang Dumarao.
Ini ang ginpahayag ni Hon. Matt Hachuela, ang alkalde sang nasambit nga banwa sang ma-interview ini sang Bombo Radyo Roxas.
Suno kay Hachuela nga indi makaapekto ang natabo nga insidente sa pagpatuman sang kalinong kag katawhay sa amu nga banwa.
Apang, ginpanugyanan sini ang mga pumuluyo nga mag-aligmat kag kun may nakakita ukon nakahibalo sa natabo nga shooting incident ang magpahibalo gilayon sa mga otoridad.
Matandaan nga ginbawian sang kabuhi ang isa ka negosyante nga ginkilala kay Johnny Habulin, 46-anyos matapos ginluthang kaina alas 7:30 sang aga sa Barangay Poblacion Ilaya, sa nasambit nga banwa. Samtang ang ginapahayag nga suspek ang wala pa makilan-an nga may kataason nga 5’7, nakasuksok sang bonnet, maong pants kag jacket nga itom.
Sandig sa imbestigasyon sang Dumarao PNP, ginapahayag nga samtang nagapanaog ang biktima sa iya salakyan hinali ini nga ginluthang sang apat ka beses sang wala makilan-an nga suspetsado.
Nag-angkon sang patal nga pilas sa magkatuhay nga parte sang lawas ang biktima kag gilayon ini nga gindala sa ospital para sa nagakaigo nga pagbulong apang gindeklarar nga dead on arrival sang doktor nga nag-atendir.
Sa karon, padayon nga ginaayam sang mga kapulisan ang nasambit nga suspek kag subong man padayon ang maid-id nga imbestigasyon sang mga otoridad kun ano ang motibo sa amu nga insidente.
