ROXAS CITY – Gintaban sang mga holdaper ang masobra tunga sa milyon nga kuwarta sang negosyante nga ila ginhold-up sa Barangay Tacas, Pontevedra, Capiz, kaina sang aga.
Ginkilala ang mga suspek nga sanday Jet Dela Torre, driver sang motorsiklo nga residente sang Brgy. Solo, sa amu nga banwa kag ang nagpangtaya sang armas-luthang amu si Rene Liboon, nga taga Brgy. Dacuton, banwa sang Dumarao.
Sa interview sang Bombo Radyo kay PMaj. Syril Punzalan, hepe sang Pontevedra MPS, nga nagpadulong sa ila talatapan ang biktima nga si Jesus Melchor Estolano, may negosyo nga buy and sell sang lukon kag pasayan, agud i-report ang natabo nga pagpanghold-up samtang nagapaguwa ini sa ila balay sakay sa angkar-angkar nga motorsiklo kag padulong kuntani sa banwa.
Suno sa biktima nga gintutukan ini sang armas-luthang sang lalaki nga nagasakay sa Rusi nga motorsiklo, kag gindeklara nga hold-up kag natigayon nga mataban ang duha sini ka bag nga nagaunod sang masobra P500,000 nga cash.
Bangud sa sini nga report, gilayon nga nag-conduct sang manhunt operation ang mga kapulisan kag ginlagas ang motorsiklo nga sakay ang mga holdaper, apang ginpahayag nga nagpalupok ang mga suspek rason nga naluthangan sa iya kamot ang driver nga si Dela Torre kag wala na makapalagyo.
Samtang si Liboon ang natigayon nga makapalagyo sa wala mahibaluan nga direksyon.
Narekober sa paghinakop ni Dela Torre ang .38 caliber revolver loaded sang 5 ka mga bala, dugang nga 4 ka mga bala sang nasambit nga armas kag1 ka bala kag baseyo sang .357.
Sa ginpatigayon nga hot pursuit operation sang mga kapulisan sa Sitio Abucayan, Brgy. Rizal, narekober sang mga ini ang pambata nga bag nga may unod nga mga gingamit nga bayo, .45 caliber armscor may magazine kag may 7 ka mga bala, cash nga nagdangat sa P565 sa nagkalain-lain nga denominasyon kag wallet nga nagaunod sang nanari-sari nga ID’s nga nakapangalan kay Jet Dela Torre kag Riza Dela Torre.
Sa karon, natalana nga pasakaan sang nagakaigo nga kaso si Dela Torre kag padayon man nga ginaayam si Liboon kag posible iban pa sini ka mga kaupdanan.
